Қазақстан Республикасы Президентінің Іс басқармасы цифрлық технологиялар саласындағы кадрлық әлеуетті дамытуға ерекше көңіл бөлуде. Биылғы жылдың басынан бері Инженерлік-техникалық орталық пен Материалдық-техникалық қамтамасыз ету басқармасының Инженерлік орталығының 25-тен астам қызметкері жасанды интеллект, цифрлық трансформация және деректерді талдау бағыттары бойынша біліктілігін арттырды.
Мамандарды даярлау Мемлекет басшысының цифрлық трансформация мен жасанды интеллектіні дамыту жөніндегі тапсырмаларына сәйкес жүргізілуде. Президент елімізді цифрландыру үдерісінің табысты болуы заманауи технологияларды тиімді енгізіп, оларды қолдана алатын білікті кадрларға тікелей байланысты екенін бірнеше рет атап өткен болатын.
Оқыту Медициналық технологиялар және ақпараттық жүйелер орталығының және басқа да білім беру ұйымдарының базасында ұйымдастырылды. Қызметкерлер теориялық біліммен қатар үлкен тілдік модельдерді (LLM), машиналық оқытуды, генеративті жасанды интеллектіні және зияткерлік автоматтандыру құралдарын тәжірибе жүзінде меңгерді. Бүгінде бұл білім мен дағдылар күнделікті жұмыста – талдамалық материалдар әзірлеуде, деректерді өңдеуде, жұмыс үдерістерін автоматтандыруда және басқарушылық шешімдер қабылдауда тиімді қолданылып келеді.
Маңызды кезеңдердің бірі – ІТ-сәулетшілер академиясында өткен оқу болды. Қаңтар айында Инженерлік-техникалық орталықтың үш қызметкері мемлекеттік ақпараттық жүйелерді жобалау және цифрлық мемлекеттің архитектурасын дамытуға арналған білім беру бағдарламасының алғашқы легіне қабылданып, оны сәтті аяқтады. Академия мемлекеттік сектор үшін заманауи цифрлық шешімдерді әзірлейтін білікті мамандарды даярлауға бағытталған.
Президент Іс басқармасы халықаралық тәжірибені зерделеуге де айрықша мән береді. Өткен айда ведомствоға қарасты ұйымдардың өкілдері Қытайда өткен «Қытай – ШЫҰ» цифрлық технологияларды дамыту және ынтымақтастық форумына қатысып, цифрландыру, жасанды интеллект және инновациялық технологиялар саласындағы озық тәжірибемен танысты.
Кадрлардың кәсіби әлеуетін дамыту жұмыстары алдағы уақытта да жалғасады. Жыл соңына дейін тағы 20-ға жуық қызметкер біліктілікті арттыру бағдарламаларынан өтеді. Бұл Президент Іс басқармасы қызметінде жасанды интеллект пен заманауи цифрлық технологияларды кеңінен енгізуге және олардың тиімділігін арттыруға мүмкіндік береді.
