Қыс маусымының соңына қарай көпшілік үшін әлсіздік, тез шаршау және жиі суық тию байқалатын кезең. Медициналық орталық ауруханасының жоғары санатты терапевт дәрігері Тұрар Кенжинаның айтуынша, бұл уақытта иммундық жүйе сыртқы және ішкі факторлардың жиынтық әсерінен айтарлықтай әлсірейді.
Қыс айларында тамақтану рационының әртүрлілігі азаяды, жаңа піскен көкөністер мен жемістерді тұтыну төмендейді, D және C дәрумендерінің, темірдің, мырыштың және В тобы дәрумендерінің қоры азаяды. Сонымен қатар қысқа күн сәулесі ағзаға қосымша жүктеме түсіріп, шаршау сезімін күшейтіп, жалпы тонустың төмендеуіне әкеледі.
Ағзаға кері әсер ететін факторлардың бірі – температураның күрт ауытқуы мен жабық ғимараттардағы құрғақ ауа. Ылғалдың жеткіліксіздігі салдарынан шырышты қабықтар құрғайды, қорғаныштық қызметі төмендеп, инфекциялардың ену қаупі артады.
Маманның айтуынша, бұл кезеңде аурудың алдын алудың негізі – салауатты өмір салтын сақтау. Ең алдымен, тәулігіне кемінде 8–9 сағат сапалы ұйқы, таза ауада жиі серуендеу және тұрғын әрі жұмыс орындарында ауаның оңтайлы ылғалдылығын сақтау маңызды.
Тамақтану да ерекше рөл атқарады. Рацион теңгерімді болып, құрамында жеткілікті мөлшерде ақуыз, көкөністер, қышқыл сүт өнімдері, жаңғақтар және мұздатылған жидектер болуы тиіс. Қажетінше және дәрігердің ұсынымымен D және C дәрумендерін, мырыш пен омега-3 май қышқылдарын қосымша қабылдауға болады. Сонымен бірге қантты тұтынуды шектеу ұсынылады.
Егер суық тию жиілеп, ұзаққа созылған әлсіздік пен жұмысқа қабілеттіліктің төмендеуі байқалса, медициналық тексеруден өткен жөн. Әдетте дәрігер жалпы қан талдауын, С-реактивті ақуызды, ферритинді, қалқанша без гормондарын, D дәрумені мен В тобы дәрумендерінің деңгейін анықтауды тағайындауы мүмкін. Өзін жақсы сезінген жағдайда зертханалық тексерулер тек маманның тағайындауымен жүргізілуі тиіс.
