Биылғы жазда Алматы ерекше ыстық болып тұр, термометр бағанындағы көрсеткіш қырықтан асып кетті. Синоптиктер мұны Иран мен Ауғанстаннан келіп жатқан ыстықпен байланыстырып отыр. Бұл қала тұрғындарына ауыр тиіп жатыр. Жел жоқ, асфальт қызып кеткен. Адамдар түгілі гаджеттер мен техниканың өзі шыдамай жатыр.
Осыған орай аномальды ыстықтан қалай сақтану керектігі жөнінде «Kazinform» агенттігінің оқырмандарына ҚР ПІБ Медициналық орталығы Ұлттық госпитальдің жедел жәрдем бөлімшесінің меңгерушісі Нұрсейіт Медеубеков айтып берді. Ұлттық госпитальге соңғы уақытта күн өтіп кету, жүрек-қан тамырлары аурулары, қан қысымының ауытқуы, әлсіздік секілді шағымдармен жиі жүгінуде. Дәрігердің айтуынша, қазіргі кезде қауіп тобына қарттар, созылмалы ауруы бар адамдар, жүкті әйелдер мен балалар жатады. Олардың денсаулығына ерекше мән берген жөн.
Күн қатты ысығанда үй-жайларда болған жөн, бас киім киюді, мойынға дымқыл орамал тағуды ұсынамын, себебі дәл осы аймақ арқылы жылу алмасу жылдам жүреді. Өзіңізбен бірге су алып жүріңіз, көп су ішіп, ағзада электролиттердің көп мөлшерде жетіспеуіне жол бермеу үшін мүмкіндігінше суға бір шымшым ас тұзын салыңыз немесе минералды су ішіңіз.
Сіңімділігі жақсы, жеңіл тағамдар ішіңіз. Жаңа піскен көкөністер, жарма, ашытылған сүт өнімдері, жеміс –жидектер, ыстық сорпаны салқын түрлерімен ауыстырған жөн, - дейді маман. Күні бойы терезелерді және оның пердесін жабық ұстау керек. Желдетудің тамаша уақыты — түн мен таңертеңгі уақыт. Ашық түсті киім болса да, жабысып тұратын киім киюге болмайды, терморегуляцияның негізгі механизмі — тердің табиғи булануына жол бермейді және бұл дененің қызып кетуіне әкелуі мүмкін.
Ыстықта мұздай душқа түсу тамырларды тарылтады, бұл құрысулар тудыруы мүмкін. Салқындап алу үшін салқын сумен шайынып, сүлгімен сүртінбеген дұрыс. Кондиционерлерден салқын тиюі мүмкін, абай болу керек. Маман бұл кеңестің барлығы келесі айда да қажет болатынын айтады, өйткені тамыз да ыстық болады деп болжанып отыр.
Материалдың толық нұсқасын мына сілтеме арқылы оқи аласыз: kaz.inform
