Денсаулық сақтау жүйесіне түсетін жүктеме үнемі артып келе жатқан жағдайда медициналық қызметкерлердің эмоциялық тұрақтылығы мен ішкі сенімділігі алдыңғы орынға шығады. Бұл, әсіресе, бөлім меңгерушілері, аға мейіргерлер, әкімшілер мен басқарушылық қызметтегі дәрігерлер үшін аса маңызды. Медициналық қызметкерлерге «ресурста» болуға не көмектесетінін ҚР ПІБ Медициналық орталығының «Медициналық технологиялар және ақпараттық жүйелер орталығы» маманы Жаннат Сағынбердіқызы Ел.kz ақпараттық порталына айтып берді.
«Үнемі өзгеріп отыратын жағдайлар, қысқа мерзімдер, ұжымдағы эмоциялық шиеленістер мен пациенттердің шағымдары менеджерлерден тек кәсіби құзыреттілікті ғана емес, сонымен қатар ішкі тұрақтылықты да талап етеді. Сондықтан эмоцияны басқару қабілеті – заманауи медицина маманы үшін ең маңызды дағдылардың бірі. Бұл тек дәріс залдарында емес, практикалық семинарлар мен тренингтерде үйретіледі. Біз МТАЖО өткізетін бағдарламаларда қатысушылар өз эмоциялық жағдайларымен белсенді жұмыс істейді: ашулануды тану, мазасыздықпен күресу және қалпына келуге көмектесетін тиімді құралдарды табу тәсілдерін меңгереді. Адам өз сезімін түсініп, онымен жұмыс істеуді үйренсе –ол стресстен сақтанады, әрекеттерінде нақтырақ, қарым-қатынаста сабырлырақ әрі күрделі сәттерде сенімдірек болады», – дейді сарапшы.
Эмоциялық тұрғыдан ауыр пациенттермен жұмыс істеу және ішкі ұжымдық жанжалдар – медициналық практиканың ажырамас бөлігі. Алайда дәл осы жағдайларға дайын болмау көбіне стресстің негізгі көзіне айналады. Конфликтология бойынша оқыту сессияларында мамандар нақты кейстерді талдап, қарым-қатынас стилін басқаруды, жеке шекараларды орнатуды және эмоциялық қысымға берілмеуді үйренеді. Оқыту барысында қатысушылар қатаң нұсқаулықтарға емес, әрекеттердің анықтығы, келісімділігі және өзара құрметке негізделген сервистік мәдениетті қалыптастыру қағидаттарын меңгереді.
Жаннат Сағынбердіқызының толық мақаласын мына сілтеме арқылы оқи аласыздар: el.kz
