ҚР ПІБ баспасөз қызметімен бірлескен жоба аясында El.kz ақпараттық порталы Іс басқармасына қарасты кәсіпорындарда еңбек ететін түрлі мамандық иелері туралы материалдар жариялап тұрады. Кезекті тақырып сирек кездесетін архивариус мамандығына арналды.
Биыл МТҚБ Инженерлік орталығының қызметкері, архивариус Эльвира Жұманова өзінің алғашқы еңбек мерейтойын – Материалдық-техникалық қамтамасыз ету басқармасы жүйесінде жұмыс істегеніне 10 жыл толуын атап өтпек.
Эльвира архив қызметіне кездейсоқ келді. Ол білімі бойынша инженер және техникалық саланың нағыз маманы ретінде МТҚБ ӘҒД-ның қауіпсіздік жүйелерін басқару қызметінде жұмыс істеп жүріп, құжаттарды мұрағатқа тапсыруға дайындау үшін уақытша көмектесуге жіберілген болатын. Тапсырманы мінсіз орындағаны соншалық, архивариус лауазымында бос орын пайда болғанда оны бірден осында шақырды. Дәл осы жерде Эльвира Жұманова өз қалауын тапты деуге болады.
«Жұмысым мінезіме сәйкес келеді әрі маған өте ұнайды. Мен бәрі өз орнында тұрғанын, тиянақтылықты, әр істі уақытылы жасағанды ұнатамын, бұл іздеу мен пайдалануды жеңілдетеді. Бұл – маған арналған! Сондықтан жұмысқа әрқашан қуана барамын, ынта-шынтамен атқарамын», - дейді Эльвира Нұғманқызы.
МТҚБ Иинженерлік орталығының архив қызметі жылына 3 мыңға тарта құжатты өңдейді және 30 мыңға жуық құжатты сақтайды. Барлығын тігу-тіркеу және мұрағатқа қағаз нұсқасында сақтау керек, оған қоса қажет кезде оңай табу үшін әр құжат мұқият сканерленеді, арнайы айдарлар мен каталогтар бойынша электронды мұрағатқа орналастырылады. Әр құжаттың сақтау мерзімі әртүрлі: 5, 10, 15 жыл. Уақытша және ұзақ мерзімді сақтауға арналғандары бар.
«Бұл жерде іш пысуға уақыт жоқ. Ақпарат ағыны күн сайын және тоқтаусыз жүреді», - дейді мұрағатшы.
Тиісті мерзімі аяқталғаннан кейін уақытша құжаттарды актілеу және жою қажет, басқа құжаттар мерзім аяқталғаннан кейін Ұлттық мұрағатқа өткізіледі.
Толық материалды El.kz сілтемесінен оқуға болады.
