ҚР Президентінің Іс басқармасында Астананың 20 жылдығына арналған салтанатты жиын өтті, деп хабарлайды баспасөз қызметі.
Іс Басқарушының бірінші орынбасары Ерлан Баттақов барлық қатысушыларды Астана күнімен құттықтады және 20 жылда мүмкін еместей көрінген жұмыстар жасалғанын айтып өтті.
«Іс Басқармасы – Қазақстанның жаңа астанасын құру жобасын іске асыруды бірінші болып бастаған орталық мемлекеттік органдардың бірі. Іс Басқармасы өзінің негізгі қызметі – мемлекеттік органдардың қызметтерін қамтамасыз етуді орындаумен қатар Парламент (Сенат пен Мәжіліс), Үкімет үйі, Министрліктер үйі, Ақорда резиденциясы, Қорғаныс министрлігі ғимараттарын салды.
Сонымен қатар, Бәйтерек монументін, Ұлттық архив пен Ұлттық кітапхананы, Бейбітшілік пен Келісім сарайын, Тұңғыш Президент Қоры ғимаратын да тұрғызды.
Нақты айтқанда, Іс Басқармасы сол жағалаудың сәулет ядросын құрды және соның айналасында үйлер, коммерциялық объектілер бой көтеріп, инфрақұрылым дамыды», - деді Е. Баттақов.
Іс Басқармасының қызметкерлері ҚР Президентінің Телерадиокешені Астананың 20 жылдығына арнайы түсірген «Ұлы дала астанасы» атты фильмді тамашалады.
Астананың дамуына айрықша үлес қосқан қызметкерлерге мерейтойлық медальдар және ҚР Президенті Іс басқарушысының құрмет грамоталары мен алғыс хаттары табысталды.
