«Егемен Қазақстан», 2 мамыр 2013
«Бірлік» болмай, тірлік болмайды
Уақыт – зымыран. Аз ғана уақытта Қазақстан әлем сахнасындағы өзінің айшықты орнын белгілеп үлгерді. Тегеурін жаман емес. Соңғы он бес жылдың ішінде мемлекетіміз әлемдегі ең серпінді дамушы елдер бестігіне енді.
Елбасымыз Нұрсұлтан Назарбаевтың «Қазақстан-2050» Стратегиясы – қалыптасқан мемлекеттің жаңа саяси бағыты» атты Жолдауында «Әлемнің барлық елдері өз дамуын салыстыратын мойындалған рейтингтер бар. Осыдан алты жыл бұрын мен алдымызға әлемнің бәсекеге қабілетті 50 елінің қатарына кіру жөнінде жалпыұлттық міндет қойдым. Қазақстан Дүниежүзілік экономикалық форумның рейтингінде 51-орынды иеленді. Біз бүгін осы мақсатымызға таяқ тастам ғана қалдық», дегені белгілі.
Расында да, ел тарихының сапалық жаңа кезеңі үлкен қарқынменен жүріп жатқанын ешкім жоққа шығара алмайды. Ал бұл істе «Нұр Отан» партиясы қашанда тың ойлар мен баянды бастамалардың ұйытқысы болып келеді. Партияның белсенділігі арқасында ел игілігі жолында талай істер қолға алынып, жүзеге асырылуда. Ал бұл істердің қай-қайсысының артында да қоғамның мүддесі, халықтың талабы жатқаны анық.
«Нұр Отан» халықтық-демократиялық партиясының «Бірлік» филиалы Қазақстан Республикасы Президенті Іс басқармасы 17 бастауыш партия ұйымының арқауында құрылғанына биыл он жыл толғалы отырғанына қарамастан, қоғамда едәуір жұмыстардың атқарылуына мұрындық болып келе жатқанын мақтанышпен айта аламыз. «Бірлік» филиалын Президенттің Іс басқарушысы Абай Бисембаев басқарады. Биылғы жылдың қаңтар айындағы көрсеткіштері бойынша партияның құрамында еліміздің әр саласында жұмыс жасайтын 5063 мүшесі бар. Филиалдың құрамына 42 бастауыш партия ұйымы мен Сенаттың 1 депутаттық тобы, Парламент Мәжілісінің 1 депутаттық фракциясы еніп отыр.
Саяси кеңес, Саяси кеңестің бюросы, Бақылау-тексеру комиссиясы бар «Бірлік» филиалы қазіргі таңда «Нұр Отан» ХДП Жарғысы мен Бағдарламасының негізгі ережелерін түсіндіру, Мемлекет басшысының жыл сайынғы жолдауларын, партия съездері шешімдерін, Президент, «Нұр Отан» ХДП Төрағасы Н.Назарбаевтың тапсырмаларын түсіндіру, мемлекеттік бағдарламаларды жүзеге асыру, патриотизм, саламатты өмір салты сияқты құндылықтарды насихаттау, партия мүшелерінің Астанамыздың қоғамдық-саяси өміріне белсенді араласуы жөніндегі әртүрлі пішіндегі шараларды жүзеге асыруда.
«Бірлік» филиалы партиялық қызметінің басым бөлігін қайырымдылық акцияларына арнап отыр. Жыл сайын «Жақыныңа жәрдем бер!», «Балғынды мектепке дайындайық», «Бүлдіршінге кітап сыйла», Ұлы Отан соғысы мен тыл ардагерлеріне тағзым ету, халықтың әл-ауқаты нашар тұрғындарына жәрдем беру секілді жұмыстар атқарылып келеді.
«Нұр Отан» ХДП «Бірлік» филиалы Саяси кеңесі бюросының қаулысымен бекітілген жоспарға сай еңбек ұжымдарында кездесулер, дөңгелек үстелдер, конференциялар, мәдени-көпшілік, спорттық шаралар ұйымдастырылуда. Мұның бәрін өткінші шаралар деп қабылдамау қажет. Атқарылып жатқан әр жұмыстың кешенді жалғастығы бар.
Қарт адамдарға жәрдем ретінде бағытталған «Ардагердің денсаулығы» атты акциясы ел арасында әжептәуір ыстық ықылас тудырып отыр. Осы акцияның аясында соғыс және еңбек ардагерлері, мүгедектер Қазақстан Президенті Іс басқармасының Медициналық Орталығында тегін медициналық тексеруден өтті. Ал Ұлы Отан соғысының ардагерлеріне 9 мамырда, әйел-ардагерлерге 8 наурызда құрмет көрсету кәдімгі дәстүрге айналды.
Балалармен жұмыс жасау, мүгедек балаларды, жетімдерді қолдау жөніндегі жұмыстарға филиал ерекше көңіл бөліп келеді. Ата-анасынан, асыраушысынан айырылған 70 бүлдіршін психоневрологиялық балалар диспансерінде ем қабылдауда, ал оқу жылы қарсаңында балалар үйлеріндегі, әл-ауқаты нашар отбасыларындағы 220 бала мектеп керек-жарақтарымен қамтамасыз етілді.
Тағы да қайталап айтайық, атқарылып жатқан қандай да бір шара бұл науқандық жұмыстар емес. Оның кешенді ойластырылған бағыты бар. Сонымен қатар, «ҚР Тұңғыш Президенті – Елбасының қоры» да бұл игілікті шараға көп көмегін көрсетуде.
«Бірлік» филиалы өз жұмысында жең ұшынан жалғасқан жемқорлықтың қас жауы екенін де тілге тиек еткім келеді. Жасыратын несі бар, бұл індет ұлттық қауіпсіздігімізге қауіп төндіретінін ешкім жоққа шығара алмайды. Филиалдың бастауыш партия ұйымдарында жемқорлыққа қарсы пәрменді жұмыстар атқарылуда. Мемлекеттік қызметкерлердің, лауазымды тұлғалардың арасында орын алып жатқан келеңсіз фактілерге тосқауылдар қойылуда. Тек соңғы үш жылдың ішінде коррупциялық қылмыстары үшін 13 адам партия қатарынан шығарылды.
Әрине, бәрі ойдағыдай деп айтуға болмайтын шығар. Бастауыш партия ұйымдарының жұмыстарын жетілдіре түсуде ақаулар да бар. Жас мамандарды партия қатарына тарту тиісті деңгейде емес. Бастауыш партия ұйымдарының кейбір төрағалары сенім үдесінен шыға алмауда.
Елбасы Н.Ә.Назарбаев кейінгі Жолдауында: «Дүниеде болып жатқан өзгерістердің сипаты мен тереңдігі, жаһандық өзара іс-қимыл ұзақ мерзімді дамуды талап етеді. Көптеген елдер қазірдің өзінде 2030-2050 жылдардың арғы жағына көз жіберуге тырысады», деген еді. Демек, күні ертеңгі жетістігіміздің іргесі осы бастан қалануы шарт.
Ол үшін не істеу керек? Тек үлкен жауапкершілік керек!
Біз жыл бойына атқарылатын жұмыстардың барысын жоспарымызға енгіздік. Ол жүйелі түрде атқарылып келеді.
Алда өтетін мынандай негізгі шаруаларға тоқталғым келеді.
- «Нұр Отан – саламатты Қазақстан үшін!», Авиация мен ғарышкерлер күніне арналған «Біз ғарышты бағындырамыз» акциясы, қаланы абаттандыруға байланысы көшет отырғызу;
- «Ұлттық бірлік – біздің стратегиялық таңдауымыз», «Ардагерлерді ардақтайық» патриоттық акциялары, «Мемлекеттік рәміздер – Отанымыздың жүрегі» мемлекеттік символдар күніне орай өткізілетін шаралар;
- спорт фестивальдерін өткізу, Қазақстан халқының мәдениетін, дәстүрі мен тілдерін білу конкурсы аясында мемлекеттік тіл күнін өткізу, жемқорлыққа қарсы күрес;
- «Нар тұлға; жүрек жылуы» республикалық акциясына қатысу, Тәуелсіздік күніне арналған спорттық акциялар, «Тұңғыш Президент күніне» арналған мерекелік шараларды ұйымдастыру, «Аяз Атаның сыйлығы – балаларға» мүгедек-балаларға көрсетілетін қайырымдылық акциясы.
Бұл атқарылатын жұмыстардың бір парасы ғана. Жоспарымызға енген басқа да тірліктер жеткілікті. Яғни, күні ертеңгіні болжағанымыз абзал. «Қамданбаған – қапы қалады» демекші, бұл жай жалаң сөз, құрғақ уәде емес, нақты жасалатын жұмыстар.
«Нұр Отан» ХДП «Бірлік» филиалы «Ғылым» бастауыш партия ұйымының жұмысына аз-кем тоқтала кетейін. Былтырғы жылдың жазында іргесін қалаған «Ғылым» бастауыш партия ұйымы өзінің қатарын «Ғылым қоры» АҚ-тың бір топ қызметкерімен толықтырып, Отан алдындағы парыздарын белгілі бір дәрежеде атқарып келеді. Жоғарыда тілге тиек етілген қарттарға қамқорлық, мүмкіндігі шектеулі отбасыларға көмек назардан тыс қалып көрген емес. Мәселен, былтырғы шілде айының 20-сында «Ғылым» бастауыш партия ұйымы мүгедек балалар үйінің аумағында демалыс сәкілерін салып берді. Мектеп оқушыларын ғылымға тарту жұмыстары жақсы бағытта ұйымдастырылып отыр. Адамзат баласының басты парызы –жақсылық жасау десек, «Нұр Отан» ХДП құрамындағы «Бірлік» филиалы да, оның қатарындағы «Ғылым» бастауыш партия ұйымы да алдағы уақытта бұл игілікті жұмыстарын үлкен ризашылықпен жалғастырады.
Елбасының «Қазақстанның әлеуметтік жаңғыртылуы: «Жалпыға Ортақ Еңбек Қоғамына қарай 20 қадам» бағдарламалық мақаласы, Қазақстан халқына жыл сайынғы жолдаулары бастауыш партия ұйымы өкілдері арасында ұдайы талқыланып, пікір алмасулар өтіп тұратынын айтсақ, әр қазақстандық азамат ел абыройы жолында алдағы кезеңде де қоғам өміріне белсене араласады деген сенімдемін.
Қуатжан УӘЛИЕВ,
«Нұр Отан» ХДП «Бірлік» филиалы
саяси кеңесінің бюро мүшесі.
