ҚР ПІБ Медициналық орталығының Санитариялық-эпидемиологиялық сараптама орталығының радиология және аспаптық өлшеулер зертханасының мамандары әртүрлі мақсаттағы нысандардағы гамма-сәулелену фонына тұрақты мониторинг жүргізуді жалғастырып келеді.
Радиациялық бақылау әкімшілік ғимараттарда, білім беру және медициналық ұйымдарда, сауда орталықтарында, өндірістік кәсіпорындарда және басқа да мекемелерде жүзеге асырылады. Гамма-сәулеленуді арнайы жабдықсыз анықтау мүмкін болмағандықтан, радиациялық жағдайды бағалау тек аспаптық өлшеулер арқылы жүргізіледі.
Өткен жылдың қорытындысы бойынша зертхана мамандары 33 974 сынама алып, гамма-сәулелену бойынша 268 835 зерттеу жүргізді. Жүргізілген бақылау нәтижесінде тексерілген нысандарда гамма-сәулеленудің рұқсат етілген деңгейінен асып кету фактілері анықталған жоқ.
Санитариялық-эпидемиологиялық сараптама орталығының радиология және аспаптық өлшеулер зертханасының фельдшер-зертханашысы Бауыржан Рахымовтың айтуынша, жүйелі мониторинг радиациялық жағдайды объективті бағалауға және адамдардың қауіпсіз жағдайда болуын растауға мүмкіндік береді.
«Жыл бойы зертхана мамандары түрлі нысандардағы гамма-сәулелену фонына ауқымды зерттеулер жүргізді. Нәтижелер гамма-сәулеленудің рұқсат етілген деңгейден асып кету жағдайлары тіркелмегенін көрсетті. Бұл тексерілген нысандардың қауіпсіз екенін растайды», – деді ол.
Зерттеулерді жүргізу барысында мамандар метрологиялық тексеруден өткен жабдықтарды пайдаланады. Соның ішінде гамма-сәулеленудің қоршаған ортадағы эквивалентті доза қуатын өлшеуге арналған ДКС-АТ1123 дозиметр-радиометрі қолданылады. Жұмыс басталар алдында жабдықтың техникалық жай-күйі міндетті түрде тексеріліп, мемлекеттік метрологиялық тексеруден өткені расталады. Одан кейін өлшеулер белгіленген бақылау нүктелерінде жүргізіледі. Алынған деректер талданып, қолданыстағы санитариялық нормалармен салыстырылады.
Тұрақты мониторинг адамдар көп шоғырланатын мектептер, балабақшалар, медициналық ұйымдар, әкімшілік ғимараттар, сауда және өндірістік кәсіпорындар сияқты нысандар үшін ерекше маңызды. Мұндай бақылау радиациялық жағдайды уақтылы бағалауға, нысандардың қауіпсіздігін растауға және санитариялық заңнама талаптарының сақталуын қамтамасыз етуге мүмкіндік береді.
Санитариялық-эпидемиологиялық сараптама орталығының сынақ зертханасы бекітілген аккредиттеу саласы аясында гамма-сәулелену фонына зерттеулер жүргізеді. Аспаптық радиациялық бақылау санитариялық-эпидемиологиялық қауіпсіздікті қамтамасыз ету жүйесінің және ықтимал радиациялық тәуекелдердің алдын алудың маңызды құрамдас бөлігі болып қала береді.
