Астана қаласында ҚР Президенті Іс басқармасы Медициналық орталығының «Қарлығаш» балабақшасы 5 жылдық мерейтойын атап өтті деп хабарлайды ҚР ПІБ баспасөз қызметі.
Ұжымды осы айтулы мерекемен Қазақстан Республикасы Президенті Іс басқарушысының орынбасары М. Мырзалин құттықтады. Мектепке дейінгі балалар мекемесі қалыптасуының бастауында болған барлық қызметкерге ҚР Президентінің Іс басқарушысы А. Бисембаев атынан грамоталар мен алғыс хаттар табыс етілді.
Іс-шара барысында балабақша тәрбиеленушілері дайындаған мерекелік концерт өтті. Қонақтар мен ата-аналар балалардың өнерін тамашалады. Олар әдемі би билеп, әсем ән айтып, театрландырылған нөмірлер көрсетті.
«Қарлығаш» балабақшасының салтанатты ашылуы Елбасы Нұрсұлтан Назарбаевтың қатысуымен өткенін айта кетеміз.
240 орынға арналған балабақша елорданың сол жағалауында орналасқан. Ғимаратта музыка залы, екі спорт залы, екі бассейн, қысқы бақ, балалар шығармашылығы бөлмесі, ертеңгіліктер мен спектакльдерді өткізуге арналған зал, сондай-ақ балалардың мектепке дейін оқытылуын және толыққанды демалуын ұйымдастыруға қажетті басқа да орын-жайлар бар.
Балабақша аумағында серуендеуге, спорт ойындарына, жол ережелерін үйренуге арналған алаңдармен қоса футбол ойнайтын алаң бар.
