Жаңа Informsport.kz порталы спорт саласындағы мемлекеттік саясатты ақпараттық тұрғыдан қолдауға, сондай-ақ елдің спорт саласындағы өзекті мәселелер бойынша қоғамдық пікір алмасуды дамытуға бағытталған.
Мұндағы басымдық Президент Қасым-Жомарт Тоқаевтың атап өткен бағыттарына берілетін болады, оның ішінде бұқаралық және жасөспірімдер спортын дамыту, спорт федерацияларының тиімділігін арттыру және Олимпиадалық резерв мектептері мен колледждерін қолдау тақырыптары бар.
Порталдың негізгі ұстанымы – балалар-жасөспірімдер спортынан бастап жоғары жетістіктер спортына дейінгі спорт саласының барлық сегментін кәсіби және объективті түрде ақпараттандыру.
Жаңа портал бір алаңға жаңалықтар мен талдау материалдарын, сондай-ақ сарапшылар пікірін тоғыстыруды көздейді. Сайтта жаңалықтар, сұхбаттар, шолулар, маман пікірлері, өңірлердегі спорт бастамалары, үздік жобалар және жас спортшыларды даярлау туралы материалдар жарияланып тұрады.
Informsport-ты құру Kazinform-ның заманауи цифрлық медианы дамыту және оның тақырыптық бағыттарын кеңейту стратегиясының бөлігі. Жаңа портал спорт қауымдастығы, кәсіби спортшылар, жаттықтырушылар, сарапшылар және барлық спорт әуесқойлары үшін сенімді ақпарат көзіне айналуды мақсат етеді.
Жобаның іске қосылуы әлемдегі ең ауқымды спорт оқиғаларының бірі – әлемнің миллиондаған жанкүйерлерін біріктіре отырып, алғаш рет АҚШ, Канада және Мексика сияқты үш елде өтетін ФИФА әлем чемпионатымен тұспа-тұс келіп отыр. Informsport оқырмандарды турнир барысы, ұлттық құрамалардың өнер көрсетуі, маңызды матчтар мен әлемдік футбол мерекесінің ең жарқын сәттері туралы жедел әрі сенімді ақпаратпен қамтамасыз етеді.
