Қазақстанда 28 сәуірде жедел медициналық жәрдем қызметкерлерінің күні атап өтіледі. Бұл күн адам өміріне араша дәрігерлердің, фельдшерлердің, медициналық мейіргерлер мен жүргізушілердің кәсіби мерекесі. Ұлттық госпитальда бүгін тәулік бойы төтенше жағдайларда әрекет етуге дайын жедел медициналық жәрдем қызметінің жұмысы туралы айтылды.
Жыл сайын Ұлттық госпитальдың жедел жәрдем қызметі 3500-ден астам шақыртуға қызмет көрсетеді. Жұмыс диспетчерлік орталықтан басталады. Онда мамандар өтініштерді қабылдап, науқастың жағдайын бағалап, шақыртудың шұғылдылығын анықтайды. Қажет болған жағдайда бригада келгенге дейін алғашқы медициналық ұсыныстар беріледі.
Шақыртуларға бекітілген клиникалық хаттамалар бойынша жұмыс істейтін дәрігерлік-фельдшерлік бригадалар шығады. Оқиға орнында мамандар тексеру жүргізіп, шұғыл медициналық көмек көрсетеді, оның ішінде реанимациялық іс-шаралар жасайды және әрі қарайғы тактиканы, яғни госпитализация немесе амбулаториялық бақылауды анықтайды.
Қызметтің маңызды артықшылығы медициналық қызметкерлердің тіркелген пациенттердің деректеріне қол жеткізуі, оның ішінде анамнезі, тексеру нәтижелері және созылмалы аурулар туралы ақпарат. Бұл диагностиканың дәлдігін арттыруға және көмек көрсетудің тиімділігін жоғарылатуға мүмкіндік береді.
Госпитальда қызметкерлердің еңбек жағдайларына ерекше назар аударылады. Бригадалар қажетті жабдықтармен, дәрілік заттармен және өзге де қажетті материалдарымен толық қамтамасыз етілген. Клиникалық жағдайларды талдау және қызметкерлердің біліктілігін арттыру тұрақты түрде жүргізіледі.
Ұжымның негізін көпжылдық еңбек өтілі бар тәжірибелі мамандар құрайды, олар қызметтің сабақтастығын және көмек көрсетудің жоғары деңгейін қамтамасыз етеді. Олардың қатарында 25 жылдан астам еңбек өтілі бар фельдшерлер, диспетчерлер мен дәрігерлер бар. Қалыптасқан кәсіби команда қызметтің тұрақты жұмысын қамтамасыз етіп, халыққа уақтылы және сапалы шұғыл медициналық көмек көрсетуді кепілдендіреді.
Кәсіби мереке қарсаңында Ұлттық госпитальда жедел медициналық жәрдем қызметінің барлық қызметкерлеріне олардың кәсібилігі, жанқиярлығы және іске деген адалдығы үшін алғыс жеткізілді. Олар өздерінің жеделдігі мен тәжірибесі және кез келген сәтте көмекке келуге дайындығының арқасында күн сайын адамдардың өміріне араша түседі.
