ҚР Президентінің Іс басқармасы Медициналық орталығы Ауруханасында ядролық медицина бағыты қарқынды дамып келеді. Бұл бағыт ауруларды ең ерте кезеңінде анықтауға және емдеу тиімділігін арттыруға мүмкіндік береді. Бұл туралы Ядролық медицина орталығының жетекшісі, медицина ғылымдарының докторы, жоғары санатты радиоизотоптық диагностика дәрігері Айгүл Сәдуақасова айтты.
Оның айтуынша, заманауи онкологиялық диагностиканың негізгі құралдарының бірі — ПЭТ/КТ әдісі. Бұл позитрон-эмиссиялық және компьютерлік томография мүмкіндіктерін біріктіретін зерттеу тәсілі. Ол ағзалардың анатомиялық құрылымын ғана емес, сонымен қатар олардың метаболикалық белсенділігін де бағалауға мүмкіндік береді. Мұндай тәсіл аурудың сатысын дәл анықтауға, ісік үдерісінің таралуын бағалауға және жүргізіліп жатқан терапияның тиімділігін бақылауға көмектеседі.
Ядролық медицина орталығында жыл сайын 12 мыңнан астам диагностикалық зерттеу жүргізіледі. Бұл еліміздің түрлі өңірлерінен келген пациенттерге жоғары технологиялық медициналық көмекті қолжетімді етеді. Орталықта 11 радиофармацевтикалық препарат қолданылады. Олар ағзадағы әртүрлі биологиялық үдерістерді — глюкоза алмасуынан бастап ісік жасушаларының белсенділігіне дейін — визуализациялауға мүмкіндік береді. Мұндай препараттарды қолдану онкологиялық, кардиологиялық, неврологиялық және эндокриндік аурулар кезінде дифференциалды диагностика мүмкіндігін кеңейтіп, дәрігерлерге емдеудің ең тиімді тактикасын таңдауға көмектеседі.
«2024 жылдың соңында Орталықта радиофармацевтикалық препарат — самарий-153 оксабифорды қолдану арқылы сүйек метастаздарын радионуклидтік терапиямен емдеу әдісі енгізілді. Бүгінгі таңда бұл емді 50-ден астам пациент алды. 2026 жылдың ақпан айында олардың бір бөлігі терапияның қайталама курсынан өтті. Клиникалық бақылау мен бақылау зерттеулерінің нәтижелері бойынша оң динамика байқалды: ауырсыну синдромы азайып, метастаздардың метаболикалық белсенділігі төмендеді. Бұл әдістің тиімділігін және онкологиялық аурулардың таралған түрлері бар пациенттердің өмір сапасын жақсартудағы маңызды рөлін көрсетеді», - деді Айгүл Сәдуақасова.
Ядролық медицинаның дамуы клиникалық нәтижелер мен медициналық көмектің сапасына тікелей әсер етеді. Заманауи технологиялар ісік үдерістерін клиникаға дейінгі кезеңде анықтауға, емдеу тактикасын уақтылы түзетуге және пациенттердің сауығып кету мүмкіндігін арттыруға мүмкіндік береді. Орталықтың басым бағыттарының қатарында радиофармацевтикалық препараттар желісін кеңейту, тераностика бойынша жаңа хаттамаларды енгізу және препараттарды өз базасында өндіруді дамыту бар. Бұл Қазақстанда жоғары технологиялық диагностика мен емдеудің қолжетімділігін одан әрі арттыруға мүмкіндік береді.
