Жүргізіліп жатқан конституциялық реформа аясында Қазақстан Республикасының Парламенті күшейтілген саяси салмаққа ие болып, мемлекеттік басқарудың толыққанды субъектісіне айналуда. Бұл туралы Парламентаризм институтының Ғылыми зерттеу орталығының басшысы Нұржан Сәулен атап өтті.
Сарапшының пікірінше, енгізіліп жатқан өзгерістер Парламенттің мәртебесін тек заң шығару органы ретінде ғана емес, сонымен қатар мемлекеттің стратегиялық шешімдеріне қатысатын институт ретінде арттыруға бағытталған. Атап айтқанда, Үкімет құрамын қалыптастырудағы рөлі күшейтіліп, Министрлер кабинетінің Парламент алдындағы саяси жауапкершілігі нақты бақылау тетіктері арқылы бекітіледі. Бұл шаралар атқарушы билікке парламенттік бақылауды жүйелі түрде нығайтуға мүмкіндік береді.
Реформа сондай-ақ заң шығару қызметінің сапасын арттыруды көздейді. Заң жобаларын қоғамдық талқылауға, сараптамалық бағалауға және қабылданатын шешімдердің ғылыми негізділігіне ерекше мән беріледі. Бұл заң шығару үдерісінің ашықтығын қамтамасыз етіп, оның қоғамдық мүдделерге сәйкестігін арттыруға жол ашады.
Сонымен қатар, конституциялық өзгерістер билік тармақтары арасындағы тежемелік әрі тепе-теңдік тетіктерін нақтылай түседі, Парламенттің бақылау функцияларын кеңейтеді және оның мемлекеттік саясатты қалыптастырудағы институционалдық салмағын арттырады. Сарапшының пікірінше, бұл қадамдар Парламентті толыққанды саяси субъект ретінде орнықтырып, құқықтық мемлекет қағидаттарын нығайтуға және саяси жаңғыру сапасын арттыруға ықпал етеді.
Толығырақ материалда
