Мерейтойлы датаға орай Қазақстан Республикасы Президенті Іс басқармасы Медициналық орталығының «Қазақстан» шипажайы шипажайлық-курорттық емдеудің қалыптасу және даму кезеңдері туралы ақпаратпен бөлісті.
Ессентуки қаласында орналасқан «Қазақстан» шипажайы өзінің 50 жылдығын атап өтуде. Бұл жарты ғасырлық тарихты, медициналық сараптаманы және қонақтардың сенімін айшықтайтын маңызды белес. Аталған мерейтой жай ғана дата емес, үздіксіз жетілуге, инновациялық әдістемелерді енгізуге және әрбір келушінің денсаулығына жанашырлықпен қарауға арналған көп жылғы еңбектің көрінісі.
Шипажай тарихы 1971 жылғы 25 қазанда Қазақстан Республикасы Президиумының қаулысынан бастау алады. Бұл құжат Ессентуки қаласында 200 орындық санаторий ғимаратының ауқымды құрылысына жол ашты. Сонымен қатар емдеу корпусы, бассейн және жатын корпусы қатар салынды. Құрылыс жұмыстарын Қазақстан Республикасынан келген құрылыс бригадалары жүргізді.
1976 жылғы 27 желтоқсанда құрылыс толық аяқталып, 1977 жылғы 5 сәуірде алғашқы келушілерді қабылдады. Емдеу корпусында биохимиялық зертхана, ванна бөлімі, атақты Тамбукан көлінің емдік балшығы қолданылатын балшықпен емдеу бөлімі, функционалдық диагностика, физиотерапия, электржарықпен емдеу және емдік дене шынықтыру кабинеттері жұмыс істеді.
Бұл жетістіктердің артында өз ісіне адал дәрігерлердің, мейірбикелердің, аспаздар мен өзге де қызметкерлердің қажырлы еңбегі тұр. 50 жыл ішінде 2000-нан астам маман кәсібилігімен, ұқыптылығымен және жанашырлығымен қамқорлық пен ем алудың ерекше атмосферасын қалыптастырды.
«Қазақстан» – күш-қуатты қалпына келтіретін, ішкі үйлесім табатын және толыққанды өмірге қайта оралуға мүмкіндік беретін орын. Бұл 50 жылдық тәжірибеге және мінсіз беделге негізделген денсаулықтың символы. Болашақта да жаңа белестер, жаңа жетістіктер және қонақтардың денсаулығына қамқорлықтың одан да жоғары деңгейі күтуде.
Жарты ғасырлық тарихында «Қазақстан» шипажайы сапалы сауықтырудың символына айналып, шипажайлық-курорттық салада жаңа стандарттарды қалыптастырды. Шипажай қабырғасында дәстүрлі тәсілдерді заманауи медицинаның жетістіктерімен ұштастыратын авторлық әдістемелер әзірленіп, тәжірибеге енгізілді. Диагностика мен оңалтуда инновациялық технологияларды қолдану осының жарқын дәлелі.
Осы жылдар ішінде «Қазақстан» шипажайында 50 мыңнан астам адам сапалы ем алып, денсаулығын нығайтты. Балалар да, ересектер де Ессентукидегі ең үздік шипажайлардың біріндегі демалысын әлі күнге дейін жылы естеліктермен еске алады.
«Қазақстан» алдағы уақытта да шипажай-курорттық саланың көшбасшыларының бірі болып қала беруді, қонақтарына сапалы ем, жайлы демалыс және ұмытылмас әсер сыйлауды мақсат етеді. Елу жылдық мерейтой шипажайдың табысты тарихындағы жаңа жетістіктер мен ризашылыққа толы пікірлерге бастайтын жаңа кезеңнің бастауы.
