Республикалық телеарналар эфирінде ҚР Президенті Телерадиокомплексі шығармашылық ұжымының ұйымдастыруымен «Символы нового Казахстана» и «Зеленый мост в будущее» атты деректі фильмдері көрермен назарына ұсынылды.
«Символы нового Казахстана» - бұл мемлекеттік рәміздеріміз асқақтататын фильм. Мемлекеттік рәміздер – бұл кез келген мемлекеттің егемендігі мен біртұтастығын бейнелейтін, оның ажырағысыз атрибуттарының бірі. Қазақстан Республикасында Мемлекеттік ту, Мемлекеттік елтаңба және Мемлекеттік әнұран мемлекеттік рәміздер болып табылады.
1992 жылғы 4 маусымда Қазақстан Республикасының жаңа Мемлекеттік рәміздері бекітілді. Сондықтан, бұл күн - Мемлекеттік рәміздеріміздің туылған күні.
Мемлекеттік ту – Шәкен Ниязбековтың туындысы. Ал елтаңба Жандарбек Мәлібеков пен Шота Уәлихановтың ерен еңбегінің жемісі. 1992 жылы еліміздің әнұранына байқау жарияланған болатын. Байқау қорытындысы бойынша, алғашқы әнұранның авторлары Мұқан Төлебаев, Евгений Брусиловский және Латиф Хамиди болды. Ал, 2006 жылы жаңа Мемлекеттік әнұран қабылданды. Еліміздің жаңа әнұраны болып атақты ән - «Менің Қазақстаным» болды. Әуенін Шәмші Қалдаяқов, сөзін Жұмекен Нәжімеденов жазған ән ондаған жылдар халық арасында кеңінен таралды. Қазақстан әнұранының сөзін уақыт өлшемімен үндестірген бірлескен автор - еліміздің Президенті.
Еліміздің Мемлекеттік рәміздері Қазақстан Республикасы Тұңғыш Президентінің Мұражайында сақталған.
«Зеленый мост в будущее» деректі фильмі Қазақстан республикасы Президенті Нұрсұлтан Әбішұлының қоршаған ортаны қорғау мен «Жасыл көпір» бағдарламасының негізінде түсірілген.
Аталған фильмдер кең көрермендік аудиторияға арналған.
