Жуырда Қазмедиа орталығында «Қазақстан Республикасының Конституциясы: мемлекеттік билікті нығайтудың және құқық үстемдігін орнықтырудың 30 жылы» тақырыбында халықаралық сараптамалық кездесу өтті. Іс-шараны Парламентаризм институты мен «Ауыл» партиясы ұйымдастырды.
Талқылаулардың негізгі өзегі Конституцияның мемлекет үшін құқықтық негіз ретіндегі рөлі және саяси жаңғыртудың басты құралы екендігі болды.
Парламентаризм институтының директоры Наталья Пан атап өткендей, Қазақстан Конституциясы билік тармақтарының бөліну жүйесін бекітіп қана қоймай, қуатты парламентаризмнің дамуына жағдай жасады. Маңызды өзгерістер: Сенаттың негізгі мемлекеттік лауазымдарға үміткерлерді келісу жөніндегі өкілеттіктерін кеңейту, заң шығару рәсімдері мен Парламент құрылымын қайта қарау, бюджет процесіне парламенттік бақылауды енгізу, Жоғары аудиторлық палатаны құру және аралас пропорционалды-мажоритарлық сайлау жүйесіне көшу бар. Бұл реформалар парламентаризмнің рөлін күшейтіп, қоғамның мемлекеттік басқару жүйесіне деген сенімін арттырды.
Талқылауға Мәжіліс депутаттары, жетекші заңгер-ғалымдар, саясаттанушылар, сондай-ақ Қазақстан, Ресей және Қырғызстанның қоғамдық институттарының өкілдері қатысты. Олардың қатарында депутат Марат Башимов, Ресейдің Мәскеу мемлекеттік заң университетінің профессоры Игорь Остапович, Қырғызстандағы ЖАМУ профессоры Кұндыз Сабирова, Әділет министрлігі жанындағы Заңнама институтының директоры Индира Әубәкірова, Қазақстан қоғамдық даму институтының басқарма төрағасы Нұрбек Матжани, сондай-ақ University, Maqsut Narikbayev University, Л.Н.Гумилев атындағы ЕҰУ және басқа да ұйымдардың өкілдері болды.
Кездесудің мақсаты – Конституцияның мемлекеттілікті нығайтудағы рөлін сараптамалық тұрғыдан талдау, 2022 жылғы референдум қорытындыларын бағалау және реформалардың құқықтық жүйенің дамуына ықпалын зерделеу. Қатысушылар ұлттық конституциялық негіздерді халықаралық озық тәжірибелермен үйлестіру қажеттігіне айрықша назар аударды.
Астанада өткен халықаралық сараптамалық кездесу еліміздің Ата Заңының 30 жылдығы аясында Қазақстанның конституциялық дамуының болашағын талқылауға арналған маңызды алаңға айналды. Толығырақ https://newsroom.kz
