Президент Іс басқармасы Медициналық орталығының «Қарлығаш» балабақшасы еліміздегі мектепке дейінгі білім беру мекемелері көшбасшыларының қатарына еніп, «Үздік балабақша – 2025» құрметті марапатына ие болды. Марапат Оқу-ағарту министрлігі тарапынан мектепке дейінгі ұйымдарға сапалы қызмет көрсетуді қолдауға және дамытуға бағытталған «Тірек мектепке дейінгі ұйымдар» ұлттық жобасы аясында табысталды.
Іріктеу барысында негізгі көрсеткіштер, атап айтқанда білім беру бағдарламаларының сапасы, оқытудың инновациялық әдістері, педагогтердің біліктілігі, балаларға қауіпсіз әрі дамытушы орта құру, сондай-ақ ата-аналардың жоғары сенімі ескерілді. Осы көрсеткіштер бойынша «Қарлығаш» өз көшбасшылық позициясын дәлелдеп, бүгінде балаларды тәрбиелеу мен оқытуға бағытталған жүйелі жұмысымен қатар, елдегі мектепке дейінгі ұйымдарға арналған құзыреттер орталығы қызметін атқарып келеді.
Әсіресе, балалардың зияткерлік, әлеуметтік және шығармашылық қабілеттерін дамытуға мүмкіндік беретін авторлық әдістемелер мен заманауи технологияларды қолдануы жоғары бағаланды. «Қарлығаштың» тәжірибесі ұлттық деңгейде белсенді түрде таратылып, Қазақстандағы мектепке дейінгі білім беру жүйесін жетілдіруге ықпал етуде.
Эмоционалды тұрақтылықты дамыту, баланың ішкі әлеуетін ашу, өмірлік дағдылар мен құндылықтарды қалыптастыру — мекеме жұмысының басты бағыттарының бірі. Сонымен қатар, балабақшада жүзеге асырылатын мәдени жобалар арқылы балалар өзінің тарихы, салт-дәстүрі және ұлттық мәдениетімен танысып, туған елге деген құрмет пен мақтаныш сезімін бойына сіңіреді.
Бұдан бөлек, «Қарлығаш» кәсіби қауымдастықтар мен білім беру форумдарына белсенді қатысып, басқа өңірлермен және елдермен тәжірибе алмасады. Осындай ашық жұмыс форматы халықаралық тәжірибелерді енгізуге және көшбасшылық ұстанымын сақтап қалуға көмектесіп, мектепке дейінгі білім берудің флагманы ретіндегі мәртебесін растайды.
Марапаттың балабақшаның 15 жылдық мерейтойымен тұспа-тұс келуі бұл оқиғаға айрықша символдық мән берді. Оқу-ағарту министрлігінің бірінші вице-министрі Майра Мелдебекова бұл марапат ұжымның мазмұнды еңбегін, педагогтердің кәсіби шеберлігін, жаңашылдықты табысты енгізуін, тәрбиешілердің жоғары жетістіктерін және ата-аналардың сенімі мен қолдауын айқын көрсететінін атап өтті.
