

Астанада Азия мемлекеттері арасында алғаш рет «Silk Way Star» ұйымдастырылған музыкалық байқауы өтеді. Бұл туралы ҚазАқпарат агенттігі хабарлады.
Жоба Іс басқармасына қарасты Қазақстан Республикасы Президентінің Телерадиокешені мен Қытайдың CMG медиакорпорациясы арасындағы халықаралық «Silk Way Star» жобасын құру туралы келісім аясында жүзеге асады.
Аталған келісімге 2025 жылы 16 маусымда ҚХР Төрағасы Си Цзиньпиннің Астанаға ресми сапары барысында, Қазақстан Президенті Қасым-Жомарт Тоқаев және Қытай көшбасшысының қатысуымен қол қойылған болатын.
Байқауға 12 ел, атап айтқанда, Әзербайжан, Армения, Грузия, Малайзия, Қазақстан, Қытай, Қырғызстан, Моңғолия, Тәжікстан, Түрікменстан, Өзбекстан және Оңтүстік Корея өкілдері қатысады.
Музыкалық байқаудың түсірілімі 2025 жылғы 20 тамызда басталады. Гранд-финал 22 — қараша күні «Jibek Joly/Silk Way» телеарнасында және байқауға қатысушы елдердің жетекші телеарналарында тікелей эфирде көрсетіледі.
«Jibek Joly/Silk Way» телеарнасының басқарушы директоры Еркежан Күнтуған:
-Бұл біз үшін жаңа тәжірибе. Мұндай ауқымды жобаны ұйымдастыру мен өткізу үлкен еңбекті, тың шешімдер мен көзқарасты талап етеді. Осы орайда біздің шығармашылық топтың креативтілігі, табандылығымен қатар ерекше құлшынысын атап өту керек. «Jibek Joly» мен «CMG» медиакорпорациясын біріктіретін осы жобаның жемісті боларына сенім зор. Сонымен қатар әлемнің түкпір-түкпірінен жиналатын, мәдениеттің, бейбітшіліктің, музыканың, ұлттық рух мен дәстүрдің елшісіндей талантты өнерпаздарға бірегей алаң ұсынып отырғанымызға қуаныштымыз. Миллиондаған көрерменімізді тың жаңалықтар және әлемнің түкпір-түкпірінде тұратын жандардың бір алаңда ұйысқанын тамашалайтын ғажайып сәттер күтіп тұр. Біз достықтың алтын көпірін орнатып, мәдениет арқылы түрлі ұлт пен елдерді жақындастыратын маңызды миссия атқарып отырмыз, — дейді.
Вокалдық байқауға қатысушылар қатарында танымал әртістермен қатар, жаңа есімдер де бар. Қазақстан атынан әнші әрі композитор, Ninety One тобының мүшесі, «Қазақстан дауысы» жобасының финалисі және X-Factor жартылай финалисі ALEM (Батырхан Маликов) қатыспақ.