ҚР ПІБ Медициналық орталығының «Қарлығаш» балабақшасының тәрбиеші-модераторы Айнұр Манкараевамен сұхбат.
Бүгінгі бала - ертеңгі өнертапқыш. Ал оның бойындағы шығармашылықты сөндірмей, қалай дамытуға болады? Бұл сұраққа 15 жылдық тарихы бар «Қарлығаш» балабақшасының тәрбиешісі Айнұр Хасенқызы жауап берді. «Әр баланың ішінде тұнып тұрған әлем бар. Ең бастысы - қиялын тұншықтырмай, керісінше, қолдау керек», – дейді маман.
Хромакей – баланың сенімін арттыратын құрал. Айнұр ханым балалармен жұмыс барысында Chroma Key әдісін қолданады. Бұл әдіс арқылы: балалар қазақ ертегілерінің кейіпкеріне айналады, табиғат құбылыстарын сахналайды, өз дауысын жазып, бейнеролик түсіреді.
Бұл тек ойын емес, сөйлеу мәнері, өз-өзіне сенімділік пен креативті ойлаудың негізі. «Жасыл экран - баланың қиялын шексіздікке шығаратын көпір», – дейді ол. Баланы шабыттандыру - ата-ананың да қолында. Үйде де шығармашылық орта қалыптастыру маңызды: түрлі-түсті бояу, ермексаз, қағаз - бала үшін нағыз қазына; Шығармашылықты ынталандыра отырып, экран алдында өткізетін уақытты ақылмен шектеу қажет.
Ең бастысы – балаға қателесуге мүмкіндік беріңіз. Біз көбіне «дұрыс емес» деп сөге саламыз. Ал мен баланың әр идеясын: «Керемет ой! Тағы да қалай жасауға болады?» – деп бағыттаймын. Сонда бала қорықпайды, сенеді, әрі қарай дамиды. Баланы дамыту - бүгінгі тәрбиешілер мен ата-аналарға жүктелген аманат.
Толығырақ Newsroom сайтынан оқыңыз newsroom.kz
