Қантамыр хирургиясы – дәлдік пен төзімді қажет ететін медицина саласының күрделі бағыттарының бірі. Осы салада ұзақ жылдық тәжірибесі бар ҚР Президенті Іс басқармасы Медициналық орталығы ауруханасының қантамыр хирургиясы бөлімшесінің меңгерушісі, «Диабеттік табан» орталығының басшысы Абылай Сейітқалиев өз кәсіби жолы мен жұмыстың ерекшелігі туралы айтып берді.
Абылай Абулқаирұлы - дәрігерлер отбасында өскен, бала күнінен адамдарға көмек көрсетуді армандап, саналы түрде хирургияны таңдаған маман. Қызмет жолын қалалық ауруханада бастаған ол алғашқы жылдарын тәулік бойы жедел медициналық көмек көрсетумен өткізді. Кейін қантамыр хирургиясына бет бұрып, бұл саланың күрделі де жауапты екенін айқын сезінгенін атап өтті.
Хирургтің айтуынша, бұл салада жұмыс істейтін дәрігерлер тек тамыр патологиясын емдеп қана қоймай, пациенттің жалпы жағдайын ескеріп, жан-жақты кешенді ем жүргізеді. Операциялар көбіне бірнеше сағатқа созылып, жоғары шеберлікпен қатар, зор төзімді қажет етеді.
Аурухана тәжірибесінде заманауи емдеу тәсілдері кеңінен қолданылады. Ашық реконструктивті операциялармен қатар, аз инвазиялы эндоваскулярлық әдістер де қолданысқа енгізілген. Мұндай әдістер тіндерді көп жарақаттамай, науқастың тез оңалуына мүмкіндік береді.
Бөлімше жанындағы «Диабеттік табан» орталығы жоғары технологияларға негізделген. Мұнда трофикалық жараларды емдеудің заманауи тәсілдері, соның ішінде фибробласттар аллотрансплантациясы сияқты әдістер жүзеге асырылады. Абылай Сейітқалиев диабеттік табанның асқыну себептері ретінде науқастардың жараны уақытылы байқамауын және амбулаториялық деңгейде түсіндіру жұмыстарының жеткіліксіздігін айтты.
Сұхбат барысында дәрігер жақсы нәтижеге жетудің негізгі шарты - дәрігер мен пациент арасындағы өзара сенім мен жауапкершілік екенін ерекше атап өтті.
Толық сұхбатты baq.kz сайтынан оқи аласыздар baq.kz
