
Анкарада Қазақстан Республикасы Президентінің Телерадио кешені мен Түркияның мемлекеттік Anadolu Ajansı ақпарат агенттігі жаңалықтар алмасу және медиа серіктестік саласындағы ынтымақтастық туралы келісімге қол қойды, деп хабарлайды ҚазАқпарат агенттігі.
Құжатқа қол қою рәсімі Қазақстан Президенті Қасым-Жомарт Тоқаевтың Түркияға ресми сапары аясында Түркия Президенті Режеп Тайип Ердоғанның қатысуымен өтті.
Келісім Қазақстан мен Түркия арасындағы ақпараттық өзара әрекеттестікті тереңдетуге бағытталған және халықаралық «Kazinform» агенттігі мен Anadolu Ajansı арасында кеңейтілген ынтымақтастықты көздейді.
Тараптар қазақ, түрік, орыс және ағылшын тілдерінде жаңалық алмасуға, оны өз платформаларында бейімдеу және жариялау құқығын пайдалана отырып, кәсіби байланыстарды дамытуға, журналистерді тағылымдамадан өткізу мен оқытуға келісім жасасты.
Келісімге ҚР Президенті Телерадио кешенінің директоры Рәушан Қажыбаева мен Anadolu Ajansı агенттігінің басшысы Сердар Карагёз қол қойды.
Қазақстан Президентінің Телерадиокешені - елдегі ірі медиа компаниялардың бір. Оның құрамына ең көне халықаралық ақпарат агенттігі «Kazinform», Jibek Joly, Silk Way, Silk Way Cinema телеарналары және Деректі фильмдер орталығы кіреді.
Anadolu Ajansı – Түркияның халықаралық ақпарат агенттігі. Ол жаңалықтарды 13-ке жуық тілде, оның ішінде ағылшын, араб, орыс, испан, француз және тағы басқа тілдерде таратады. Агенттіктің 100-ден астам елде, соның ішінде Қазақстан, Ресей, Қытай, АҚШ, Германия, Қатар, Иранда тілшілер желісі мен кеңселері бар.
2025 жылы Anadolu Ajansı мен «Kazinform» ақпарат агенттіктерінің екеуі де 105 жылдық мерейтойын атап өтеді.
Толығырақ kaz.inform.kz