Бүгін ҚР Президенті Іс басқармасында мемлекеттік қызметшілердің кірістері мен мүлкі туралы декларацияны толтыруға қатысты заңнамалық өзгерістер мен жаңашылдықтарға байланысты түсіндіру семинар өтті.
Семинарды Іс басқармасының ұйымдастыру-бақылау және кадр жұмысы бөлімі басшысының орынбасары, Әдеп жөніндегі уәкіл Шолпан Жұмағұлова ашып, мемлекеттік қызметшілердің мемлекет пен қоғам алдындағы қаржылық есептілігінің мінсіз болу маңыздылығына тоқталып, шақырылған спикерді таныстырды.
Астана қаласы бойынша Мемлекеттік кірістер департаментінің Өндірістік емес төлемдер басқармасы, жеке тұлғаларды әкімшілендіру және жалпыға бірдей декларациялау бөлімінің басшысы Алтынгүл Тоқаева декларацияны тапсыру кезінде ескерілуі тиіс жаңалықтар, өзгерістер мен толықтырулар туралы айтып, құжатты толтыру тәртібін егжей-тегжейлі түсіндірді.
Кездесу соңында мемлекеттік қызметшілерден түскен сұрақтарға жан-жақты жауап берілді.
