Бала балабақшада тек ойнап қана қоймайды - ол үнемі айналасындағы әлемді танып-білуге ұмтылатын кішкентай зерттеуші. Бұл қызығушылықты сақтау мен дамыту - тәрбиешінің басты міндеті. ҚР ПІБ Медициналық орталығының «Қарлығаш» балабақшасының педагог-модераторы Жаңагүл Маратқызы танымдық белсенділікті арттырудың заманауи әдістері туралы айтып берді.
Жаңагүл Маратқызының айтуынша, баланың интеллектуалдық дамуы - оның сұрақ қоюынан басталады. Ойын арқылы үйрету, еркін таңдау беріп, зерттеу мен тәжірибе жасауға мүмкіндік жасау - баланың қызығушылығын арттырады. Мысалы, «Құпия қорап», «Зерттеу бұрышы», «Ойын-саяхат» сияқты әдістерді балалар ерекше ықыласпен қабылдайды.
«Қарлығаш» балабақшасында әзірленген авторлық «Бастау» бағдарламасында баланың танымдық, эмоционалдық, шығармашылық және дене дамуына кешенді түрде назар аударылады. Сонымен қатар тәрбиешілер Финляндия, Сингапур, Жапония және Италияның (Reggio Emilia) алдыңғы қатарлы әдістерін тәжірибеге енгізіп жүр. STEAM (ғылым, технология, инженерия, өнер және математика) тәсілі де балабақшада кеңінен қолданылады.
Маман ұяң балаларды баулу үшін «тыныш бақылау» әдісін қолданады - яғни сенім артып, әр кішкентай жетістігі үшін мадақтап, жеке көңіл бөледі. «Әр бала - ұшуға дайын қарлығаш. Біздің міндетіміз - оған қанат бітуге емес, самғауға жағдай жасау», - дейді Жаңагүл Маратқызы.
Сұхбаттың толық нұсқасын мына сілтеме арқылы оқи аласыздар: el.kz
