Балаларға арналған тауарларды таңдау – ата-ананың ең маңызды шешімдерінің бірі. Себебі өсіп келе жатқан ағза үшін сапасыз өнімдер өте қауіпті. ҚР Президенті Іс Басқармасы Медициналық орталығының Референс-зертханасы мамандары Kaznovosti ақпарат агенттігіне берген сұхбатында балалар тауарларындағы қауіптер мен оларға қойылатын талаптар туралы айтып берді.
Мамандардың айтуынша, сапасыз өнімдердің құрамында формальдегид, фталаттар, ауыр металдар сияқты улы заттар болуы мүмкін. Бұл қосылыстар баланың денсаулығына елеулі зиян келтіруі ықтимал — тері тітіркенуінен бастап, созылмалы ауруларға дейін апаруы мүмкін.
Балаларға арналған өнімдер міндетті түрде санитариялық-химиялық, токсикологиялық және физика-химиялық сынақтардан өтуі тиіс. Мұндай сынақтар өнімнің құрамындағы қауіпті заттарды анықтауға және оның қауіпсіздігін растауға мүмкіндік береді. Қазақстанда балалар тауарларының қауіпсіздігі ЕАЭО техникалық регламенттерімен реттеледі, ал халықаралық ISO/IEC 17025 стандарты бойынша аккредиттелген Референс-зертхана зерттеулердің жоғары дәлдігі мен сенімділігін қамтамасыз етеді.
Мамандардың кеңестері:
Өнімнің таңбалануын және сертификаттарының болуын тексеріңіз;
Химиялық иісі бар тауарларды сатып алудан бас тартыңыз;
Стихиялық нарықтарда сауда жасамаңыз;
Күмән туған жағдайда зертханалық сараптамаға жүгініңіз.
Референс-зертхананың мамандары еске салады: әрбір ата-ана өз баласына сатып алатын тауардың құрамын білуге құқылы. Сұрақ қойыңыз, өнімнің шығу тегін анықтаңыз, сертификаттарының бар-жоғын біліңіз — дәл осындай қарапайым күнделікті шешімдерден шынайы қамқорлық басталады.
Мамандардың толық кеңестерін мына сілтеме арқылы оқи аласыз: kaznovosti
