ПІБ Медорталығы Ұлттық госпиталінің травматологтары 102 жастағы қарияға күрделі операция жасағады. Бұл бірегей операция туралы отандық БАҚ-тар жарыса хабарлап жатқанын атап өткен жөн.
102 жастағы Зейнеп Әбілжанова жамбас сүйегі сынып, ауруханаға жатқызылған болатын. Бұрын мұндай жарақат зейнеткерлер үшін үкіммен тең еді. Ал қазір травматологтар оның емін тауып, аяғына тік тұрғызуға машықтанған. Тіпті, ғасыр жасаған адамдардың өзі балдақсыз, таяқсыз жүріп кететін кездер болады.
Науқастың жасы келгеніне қарамастан, Ұлттық госпиталь травматологтары жамбас сүйегінің ұршығын имплантантпен ауыстыру операциясын жасауға шешім қабылдады.
-Операция пациенттің басқа да диагноздарына байланысты күрделене түсті. Миниинвазивті әдіспен жасалатын операция алдында біз әртүрлі бағыттағы мамандарды жинап, консилиум өткіздік. Операцияға қарияны дайындау үшін арнайы емдеу шаралары қажет болды. Оның барлығы сәтті жүргізілді. Нәтижесінде жамбас сүйегін имплантациялау операциясы да ойдағыдай сәтті өтті. Келесі күні Зейнеп әжесі өз бетінше отыра алатын болды, - дейді травматолог Айбек Дәуіржан.
Операция міндетті әлеуметтік медициналық сақтандыру аясында жүргізілді, деп хабарлады kaz.inform.kz агенттігіне емдеу мекемесінің баспасөз хатшысы.
Осы оқиғаның бас кейіпкері Зейнап әжей абайсызда құлап қалғанға дейін белсенді өмір салтын ұстанған адам. Ол еңбек майданының ардагері, алты бала тәрбиелеп өсірді, көптеген немерелері мен шөберелері бар. Жүз жастан асқан қария ұзақ жасауға өмір сүруге деген құлшыныс, еңбекқорлық көмектескенін айтады.
