Президенттік орталықта ҚР ПІБ Медициналық орталығы ауруханасының ұйымдастыруымен «Заманауи хирургиядағы жоғары технологиялар» халықаралық ғылыми-практикалық форумы басталды.
Хирургияның барлық бағыттарына қатысты озық тәжірибелер мен жаңа әдістер талқыланатын алқалы жиынға АҚШ, Қытай, Ресей, Германия, Словения, Кувейт, Қырғызстан, Өзбекстан, Тәжікстан сынды әлем елдерінің, сондай-ақ Қазақстанның белді медициналық орталықтарының жетекші мамандары қатысып жатыр.
Ашылу салтанатында ҚР ПІБ Медорталығы ауруханасының директоры Рустам Албаев:
- Халықаралық ғылыми-тәжірибелік форумда инновациялық, аз инвазиялық және қауіпсіз хирургия мәселелерін талқылау үшін ұйымдастырылып отыр. Бұл диалог алаңы баршамыз үшін пайдалы болады деп үміттенемін. Осы орайда, біздің аурухананың хирургтері де жоғары технологияларды жүйелі түрде қолданып жүргенін атап өткім келеді. Ол үшін мамандарымыздың әлеуеті де, аурухананың техникалық мүмкіндіктері де жеткілікті. Бірқатарымен форум барысында өздеріңіз де танысасыздар,- деп атап өтті.
Конференция аясында күрделі жағдайларды тәжірибе жүзінде көрсететін шеберлік сағаттары, операция залынан онлайн трансляция курстары, дөңгелек үстелдер мен тақырыптық секциялар ұйымдастырылады.
Осымен екінші мәрте өтіп жатқан форумда мыңға тарта спикер жалпы хирургия, урология, проктология, гинекология, кардиохирургия, нейрохирургия, қантамыр хирургиясы, интервенциялық хирургия, аритмология, оториноларингология, офтальмология сынды ересектер хирургиясының барлық бағыттарын қарастырады.
Шеберлік сабақтарында Медорталықтың жоғары санатты хирургтерінің күрделі операциялары тікелей трансляция арқылы көрсетіледі.
