Елордада Парламентаризм институты Конституциялық Сотпен бірлесіп «Конституция: құқық үстемдігі, азаматтық қоғам мен қазіргі мемлекеттік құндылықтарды дәріптеу» атты халықаралық ғылыми-практикалық конференция өткізді.
Алқалы жиынға Конституциялық Соттың судьялары, Парламент депутаттары, мемлекеттік органдардың, ғылыми және заң қоғамдастықтарының, ЕҚЫҰ Астанадағы кеңсесінің өкілдері, сондай-ақ Германия, Финляндия, Швейцария, Өзбекстан және Қырғызстан елдерінің сарапшылары қатысты.
Олар адам құқығы мен ерікдігін ілгерілетудегі конституциялық бақылаудың рөлі туралы өзара пікір алмасты. Талқылау барысында мемлекет пен қоғамның тұрақты дамуын қамтамасыз ету тұрғысында Конституциялық сот төрелігін жетілдіруге басты назар аударылды.
Конференцияда Конституциялық сот төрелігін одан әрі жетілдіруге және елдегі құқық үстемдігін нығайтуға бағытталған ұсынымдар әзірленді. Конституция күні қарсаңында өткен конференцияның қорытындылары демократиялық құндылықтарды ілгерілетіп заңның үстемдігін қамтамасыз ету үшін мемлекет, қоғам және халықаралық сарапшылар арасындағы диалогтың маңыздылығы екені айтылды.
