ҚР Президентінің Іс басқарушысы Айбек Дәдебаев өзінің ресми телеграм арнасында Медициналық орталыққа қарасты шипажайлардың жұмысына қысқаша қорытынды жасады.
-Жалпы, «Оқжетпес, «Almaty Resort» және «Қазақстан» емдеу-сауықтыру кешендеріне биылғы жыл жемісті болып тұр десек артық емес. Қаңтар-қараша айларында сапалы ем алуға және демалуға келушілер саны 26 мың 306 адамға жеткені осыны көрсетеді. Шипажайлар жылдық жоспарды 11 айдың ішінде орындап, кейінгі 10 жыл ішіндегі ең жоғары нәтижеге қол жеткізді, - деді Айбек Дәдебаев.
Президенттің Іс басқарушысы атап өткендей, шипажайларға ел азаматтары мен шетелдік қонақтардың көңілі толды деуге негіз бар. статистикалық деректер солай дейді. Жайлылығы, мамандардың кәсіби емдеу шаралары мен медициналық бағдарламалар жұртшылық тарапынан лайықты бағаланып отыр.
Айбек Дәдебаев келушілер саны мен сапалы қызмет бойынша өте жақсы нәтижеге жеткен шипажай ұжымдарын құттықтап, жаңа белестерді бағындыруына тілектестігін білдірді.
