18-19 қазанда ҚР Президентінің Іс басқармасына қарасты Медициналық орталық ауруханасының жоғары санатты дәрігерлері – ангиохирург Талғат Сәрсембаев, кардиохирург Ерлан Денеев және аритмолог Шалқар Смағұлов Орал қаласында күрделі науқастарды қабылдап, консультативтік көмек береді.
Келушілерді кардиохирург пен аритмолог – облыстық кардиологиялық орталықта, ал ангиохирург – облыстық көпсалалы ауруханада (диагностикалық корпус) қабылдайды. Мамандар 18 қазан күні 10:00-ден 18:00-ге дейін, 19 қазанда 09:00-ден 18:00-ге дейін жұмыс істейді (13:00-14:00 аралығында түскі үзіліс).
Кеңес алуға келушілердің қолында жеке басын куәландыратын құжаты мен бұрынғы сараптамалары болуы керек. Дәрігердің дәл диагноз қойып, шешім қабылдауы үшін:
- кардиохирургке – ЭКГ, ЭхоКГ хаттамасын, коронарография/КТ дискісін және қолда бар үзінді көшірмелерін, тексерулерін, сараптамаларын;
- аритмологқа – ЭКГ, Холтер ЭКГ, ЭхоКГ хаттамасын;
- ангиохирургке – қантамыр УДДГ, КТ дискісін немесе аортография және қолда бар үзінді көшірмелерін, сараптамаларды әкелу қажет.
ҚР ПІБ білікті мамандары жоғары технологиялық медициналық қызметтің қолжетімділігін арттыру үшін жыл сайынғы дәстүрлі акция шеңберінде жасы 18-ден асқан азаматтарға консультативтік көмек көрсетеді.
– Біз өңірде жиі кездесетін ауру түрлерін ескере келе биыл кардиохирург, аритмолог, ангиохирургтар барғаны дұрыс деп таптық. Осыған дейін 9 ай ішінде біздің мамандар 8 облысты аралап, 1000-ға жуық науқасқа көмек көрсетті, – дейді бригада мүшесі Талғат Сарсембаев.
Ресми дерек бойынша, республиканың 650 елді мекенінде емдеу мекемесі жоқ. Облыс орталықтарының өзінде білікті салалық дәрігерлер жетіспейді. Бұл проблема Мемлекет басшысы Қ.Тоқаевтың биылғы Жолдауында да көрініс тапқан болатын.
ҚР Президентінің Іс басқармасына қарасты Медициналық орталық ауруханасының мамандары жыл сайын «Менің сүйікті дәрігерім» көшпелі акциясын өткізу арқылы өңірлерде тұратын халықтың денсаулығын жақсартуға үлес қосып келеді.
Анықтама:
Медициналық орталық ауруханасы (МОА) елорданың көшуіне орай 1997 жылы Астана қаласында ашылды.
МОА – медициналық көмек пен пациенттердің қауіпсіздігін ұйымдастырудың ең қатаң халықаралық стандарты – JCI бойынша сертификатталған заманауи, көп салалы, толық циклді емдеу мекемесі.
Аурухананың емдеу-диагностикалық бөлімшелері заманауи медициналық жабдықтармен жабдықталған.
МОА штатында медицина ғылымдарының докторлары мен кандидаттары, PhD докторлар, жоғары және бірінші біліктілік санатқа ие дәрігерлер бар. Барлық мамандар алыс шетелдердің үздік клиникаларында біліктілігін арттырады.
ҚР ПІБ Медициналық орталығының ауруханасы мемлекеттік қызметшілерге медициналық көмек көрсетуге мамандандырылған. Сондай-ақ, МОА қазақстандықтарға ҚР Денсаулық сақтау министрлігінің мемлекеттік тапсырысы бойынша тегін медициналық көмектің кепілдік берілген көлемі (ТМККК) шеңберінде, міндетті әлеуметтік медициналық сақтандыру жүйесі (МӘМС) бойынша және ақылы негізде қызмет көрсетеді.
2022 жылдың 9 айында МОА-да 9995 пациент – стационарлық, 527 031 пациент – амбулаториялық білікті медициналық көмек алды.
ҚР ПІБ Баспасөз қызметі
